Hasta los 67 y más allá

09-02-2010 Daniel García (Estaya de l'Alministración Pública)

Tamos n’Asturies, onde les coses vense d’otra manera, precisamente por mor de ser Asturies y llevar nel carru la carga de tolo que vamos arrastrando a lo llargo la hestoria.

Ya mos conocemos y mos entendemos: tú echa un culín y un cantarín, que ya pasará too, mecagüenmimantu, hai qu’armala. Filosofia que mos enferma, y esperemos mos faiga curar dalgún día. Les xeneraciones que vienen detrás decidirán.

Si lo de trabayar pal bien común nun esiste ente los políticos del nuesu entornu, una evidencia constatable con daqué tan cenciello como mirar qu’empreses fain negociu col dineru públicu, y como furrula’l gastu na alministración, agora, como medía pa sacar más perres pa mantenese nel sitiu y seguir faciendo negocios, toca seguir metiendo mieu col nuesu futuru, y proponen que se trabaye hasta los 67 años. Tou ello, debíu, suponse, a lo mal que tán les coses económicamente, lo que non cuadra colos porgüeyos qu’amuesen los grandes bancos y la rialidá de los datos d’un mayor aforru nes cuentes familiares.

Con echar un güeyu nos pocos requexos d’espresión que dexa la prensa y otros medios de comunicación, y lo que s’escribe en dalgunos foros d’interné, vese como cualaquier ciudadanu amuesa les sos postures sobre qu’idegues y planteamientos son necesarios p’aforrar nel gastu públicu y ameyorar esti sistema, idegues per fáciles d’aplicar bien ceo, y con rempuestes cercanes, pero nun ye eso lo que pretenden los gobernantes, ye tamién evidente, ya que nun veremos menguar nin los sos sueldos, nin les sos prebendes, nin facer un usu más racional del gastu, más bien tolo contrario, si hai que recortar, meyor ente los sueldos de los trabayaores y del so vivir diariu. Esto fai qu’anguaño siga viva la frase, ya mui glayá a lo cabero de la década los setenta, de: la crisis social que la pague’l capital, pero ¡Qué va¡, el capital sigue apigarrando perres y los nuesos gobernantes non-y pide cuentes, tolo contrario dan-y más facilidaes tovía pa que los banqueros sigan armándoles y calteniendo un sistema inxustu que lleva a los ricos a ser más ricos y los probes, más probes.

¿Qué mos toca facer entós pa intentar defendemos de tou esto y que mos afecte lo menos posible?.

Una de les cuestiones que se plantea la sociedá, y cola que xuegen cada vegada más los gobernantes pa seguir na so tayuelona, ye usar el mieu al futuru, el mieu al qué vendrá, y sobre tou, en sociedaes como’l casu de l’asturiana, onde la xente ye cada vegada más avieyá, danse les circunstancies más afayaíces pa que la xente tenga medrana y se faiga muncho más conservadora, pol cenciellu fechu de que, depués de trabayar media vida quies conservar lo que conseguisti, si amás s’afalaga que vivir meyor ye tener delles coses que mos ufierta la sociedá de consumu, pos ya tamos enguedayaos nun ámbitu del que ye bien abegoso salir, y nel que ya nun tienes ganes de lluchar pa que cambie ná, ¡Qué lo faigan los que vengan detrás¡, y si amás, como pasa n’Asturies pol tema la natalidá, les xeneraciones que vienen detrás son poco xente y con poca esperiencia, lo que tenemos ye la rialidá cola que convivimos. Asina, los que gobiernen fain lo que-yos da pola gana ensin oposición dala.

Ello ye, que por si acasu queda xente con ganes de retolicar y denunciar qu’esto puede cambiase en beneficiu del común, fuérzase entovía más el sentíu del mieu al futuru pa que nadie se mueva, pero, lo mesmo que pa tratar otros mieos, la cencia terapéutica apúrremos una igua, vivir el presente, la rempuesta de llucha de la clase trabayaora ye siempre vivir y ver el presente, porque’l futuru ya lu saben los gobernantes, y esi ya lu tenemos perdíu dafechu, por eso non podemos tenelu en cuenta, vivir y lluchar pol presente, ye la meyor arma que tenemos, ye la meyor manera d’intentar cambiar esi futuru que ya mos tienen hipotecáu.

Na Corriente Sindical d’Izquierdes, xuntu con otros collectivos, intentamos dar esa rempuesta al presente, organizamos, dar la cara nel día a día y quitamos el mieu d’enriba. Non podrá decise que non s’intenta, y dalguna pequeña batalla ganada nel presente pudiere cambiar un futuru que non mos gusta. Caún dientro les sos posibilidaes y los tiempos que cuerren, pero tamos ehí, y cada vegada dase cuenta más xente.

PONTI A TRABAYAR, LLUCHA POL PRESENTE,

HASTA LOS 67 Y MÁS ALLÁ.

LA CRISIS SOCIAL QUE LA PAGUE’L CAPITAL.