Constitución de la mesa sectorial de negociación

Versión en castellano

Comunicáu de la Estaya d’Alministración pública de la CSI

Güei, vienres 18 de setiembre del 2009, constituyóse (por fin) la Mesa Sectorial de Negociación de l’Alministración Xeneral del Principáu d’Asturies.

La Corriente Sindical d’Izquierda acudió a la mesma cola intención (espardida bien d’ello estos años) de consiguir que la Mesa reflexe la realidá que salió de les eleiciones sindicales na negociación de los asuntos que afeuten direutamente a les emplegaes y emplegaos públicos del Principáu. La nuesa intención como sindicatu, manifestada en forma de propuesta p’añader al testu del Reglamentu, ye que los asuntos a tratar nesta Mesa nun queden nos que graciosamente quieran delegar l’Alministración y les élites sindicales presentes na Mesa Xeneral, sinón que se puedan incluyise los temes que propongan polo menos la metá de les organizaciones sindicales presentes na Mesa Sectorial.

Nesta reunión quedó clara la realidá na negociación y nes rellaciones llaborales de la nuesa empresa: l’Alministración faciendo piña con UGT y CCOO pa defender qu’esta Mesa Sectorial tenga les menos competencies posibles y preservar asina un modelu de negociación elitista y reducíu; y per otru llau’l restu d’organizaciones sindicales (Corriente, CSIF y USIPA) intentando que la negociación s’abra lo máximo, tanto en cuestión de temes a abordar como nos participantes na mesma. Esto ye lo qu’hai y asina mos va.

Pela nuesa parte vamos siguir intentando qu’esta Mesa Sectorial nun sía namás un paripé sinón que traten a fondo y de manera efeutiva los asuntos qu’afeuten a los intereses de los emplegaos públicos. Vamos intentar cuntar col apoyu de les demás organizaciones que tean na nuesa llinia pa consiguir estos oxetivos.

De too ello vamos dir dando cumplida información.