FIRMA DEL ALCUERDU SOBRE CARRERA PROFESIONAL

Versión en castellán

Comunicáu de la Estaya de la Alministración Pública de la CSI

El 3 de payares pasáu firmóse l’alcuerdu que vien a dar cobertera llegal a la enorme arbitrariedá na que se convirtió l’intentu d’implantar na nuesa Alministración la llamada carrera profesional (en realida trátase d’una mala carrera horizontal). Como yá se barruntaba desque entamó esti llastimosu paripé de negociación na Mesa Xeneral, tamos énte un calcu de lo que yá había (eso sí, empeorao), xunto col compromisu (¿) de que tolo demás va negociase nel Proyeutu de Llei de Función Pública.

LOS SUPUESTOS LLOGROS. Los firmantes del alcuerdu (CCOO y UGT) resalten trés grandes llogros nesti alcuerdu: el compromisu de que se va reactivar la negociación de la Llei de Función Pública; el compromisu de que la negociación de la carrera, con toles concreciones necesaries, va acabar nel primer trimestre del 2010; y el compromisu de que la primer evaluación del desempeñu va tar rematada nel tercer trimestre del 2010. Sobren los comentarios, toos sabemos la flexibilidá negociadora de l’Alministración y la maña de los sindicatos mayoritarios p’algamar grandes alcuerdos.

LA CONTRAPARTIDA. Empara d’esos “grandes llogros”, atopamos un retrocesu respeuto de lo qu’había hasta agora: el periodu p’algamar la cuarta categoría o nivel de la carrera xube de 20 a 29 años. De la mesma manera, sigue marxinándose a los más de 5.000 emplegaos públicos que nel so momentu nun pudieron o nun quixeron sumase a un cheque en blancu peligrosu; yá que los efeutos d’esti alcuerdu nuevu nun van tener calter retroactivu al 2007. Y de los interinos y temporales yá nin falamos, ¿pa qué? Desapaecieron direutamente de cualquier intentu de negociación sobre la so situación (hasta les eleiciones sindicales siguientes, claro). Y lo más grave (de lo que naide fala y sobre lo que nós aporfiamos hasta velo y dexalo): nel actual borrador de la Llei de Función Pública (y que sepiamos nun se camudó y duldamos de que vaya camudar la situación), ente otres munchas agresiones, desapaez como conceptu retributivu’l complementu de destín y apaez el complementu de carrera. ¿La persona que nun futuru no se sume a la carrera va perder el complementu de destín? ¿Ónde ta la voluntariedá de sumase si nel casu de que nun lo faigas vas perder una parte significativa de les retribuciones? Y respeuto al personal interín y temporal ¿va perder direutamente esa parte del sueldu?

OTROS ÁMBITOS, OTROS SINDICATOS. Queremos recordar aquí a los compañeros d’enseñanza y sanidá de CCOO que planteguen oposición a esta carrera en términos bien asemeyaos a los nuesos. CCOO de Sanidá denuncia públicamente que col alcuerdu firmáu polo sos compañeros d’Alministración Pública, 400 collacios del SESPA van tener un retrocesu ne condiciones p’acceder a esti modelu de carrera con rellaicón a lo que yá esfruten el resto de collacios representaos pola so Federación de Sanidá. SUATEA y CCOO d’Enseñanza refuguen tamién la firma d’esti alcuerdu y defenden básicamente la mesma posición pa los docentes que la que defendemos dende la CSI pa tolos emplegaos públicos ¿Ye CCOO como la China actual: un sindicatu, dos sistemes?

POR FIN, LA EVALUACIÓN. Nesti últimu añu los emplegaos públicos “esfrutaron” d’una evaluación del desempeñu a monera d’ensayu xeneral llarada d’agravios comparativos y penalizaciones, disparidá total de criterios a la hora d’evaluar; xustamente tolo contrario al respetu de los principios de tresparencia, oxetividá, imparcialidá y non discriminación. Tou un ataque frontal a los mencionaos principios y a la independencia que tien que tener un emplegáu públicu. Eso sí, yá no podemos falar de cheque en blancu, agora sabemos a les clares lo que quieren faer con nós. LA VENGANZA. El remate a estos despropósitos ta en penalizar a la xente que dende l’añu 2007 nun se sumó a esti tresmontoriu d’actos illegales, y que se ñegó a respaldar la discriminación de los non fixos, les diferencies salariales obscenes, la firma d’adhesiones a ciegues, y evaluaciones verticales por persones que los políticos nomen a deu. Estos nun tienen drechu a nada, nun siendo con sentencia xudicial, que les hai y que l’Alministración atesterona en siguir incumpliendo. D’esta miente ye que s’escomienza a castigar a los díscolos.

DISCRIMINACIÓN Y ESCLUSIÓN ENTE EMPLEGAOS PÚBLICOS, ARBITRARIEDÁ NA EVALUACIÓN, PENALIZACIÓN SALARIAL, YE’L PANORAMA D’UNA ALMINISTRACIÓN QUE PRETENDEN AL SERVICIU ÚNICU Y ESCLUSIVU DEL GOBIERNU ASTURIANU, Y NON AL DE CIUDADANOS Y CIUDADANES.