La CSI denuncia'l funcionamientu del SERIDA baxo'l gobiernu de IX

Comunicáu de la Estaya de l'Alministración de la CSI

20-11-2009 Dende la Corriente Sindical d’Izquierda denunciamos énte la opinión pública, la situación a la que ta llevando IX al SERIDA (Serviciu Rexonal d’Investigación y Desarrollu Agroalimentariu).

La xestión que se ta llevando nel SERIDA desepárase cada vez más de la que se tendría que faer nun centru públicu d’investigación agraria al serviciu del campu asturianu y confírmase claramente como un chiringuito en manes d’IX.

De forma mui clara y concreta denunciamos una serie de fechos que se producen diariamente nesti centru, y de los qu’Aurelio Martín (Conseyeru de Mediu Rural y Pesca, máximu responsable del SERIDA) tiene conocimientu total, ensin que paeza importa-y lo más mínimo.

El SERIDA investiga y s’investiga sobre lo que la xerencia y compañía dicen, lo que prima ye l’afinidá col poder instauráu y lo de menos la comenencia de lo investigao o la idoneidá del investigador. Contrátase de forma irregular. Nesti momentu’l centru tien la mayor tasa de temporalidá de la so hestoria, esto a pesar de la enorme cantidá de vacantes ensin cubrir. Una parte del personal nun tiene control horariu dalu. Sobrepásense descomanadamente’l númberu d’hores estres que marca la llei, ensin informar al comité d’empresa de les mesmes. Recúrrese a les subcontrates pa realizar funciones propies de los trabayadores del centru. Incúmplese de forma sistemática la Llei de Prevención de Riesgos Llaborales. Úsense diariamente coches oficiales pa usu personal. Reprímese a los trabayadores que nun son sumisos y nun acepten entrar nel xuegu; consecuencia direuta d’esto ye l’esmantelamientu del centru de La Mata en Grau. Manéxase al personal de manera arbitraria dafechu, en cuantes a horarios, centru de trabayu, compensación por hores estres, funciones que se realicen y, como remate, el SERIDA faise cargu d’un centru permodélicu y permodernu, con múltiples deficiencies constructives y de diseñu, asumiendo un gastu descomanáu pa ponelu a puntu, mientres el Conceyu Xixón se fai cargu de 10 hectárees de terrenu “nel barriu obreru de Somió”, con un valor incalculable, esto ye, un pelotazu urbanísticu en toa regla.

Dende la Corriente consideramos inalmisible dafechu que baxo’l gobiernu d’IX se tea faciendo nel SERIDA lo que nunca s’atrevió a faer nin el PSOE nin el PP.