Énte la manifestación convocada por CC O, UGT y USO nes Cuenques Mineres

Lleer versión en castellán

Manifiestu de la CSI del Valle del Nalón y del Caudal

19-11-2009 Énte la manifestación convocada por CC OO, UGT y USO pal martes día 24 de payares, con salida a les 7:30 de la tarde del Parque Dolores Duro (La Felguera), la C.S.I. MANIFESTAMOS:

1º- La manifestación llega tarde, yá que la mayoría de les empreses creaes colos fondos mineros y trabayadores de les Cuenques yá tán afeutaos por Espedientes de Regulación d’Emplegu (ERE), con despidos o pesllaes.

2º- La manifestación ye una respuesta insuficiente énte la gravedá de la crisis y, poro, ye menester siguir convocando movilizaciones pa esixir que la crisis creada pola patronal y el gobiernu nun lleve a los trabayadores y a la mocedá a un camín ensin salida ¿Qué va pasar n’agotando el desemplegu la gran mayoría de los que tán en paru, y nun tengan pa comer? ¿La manifestación qué ye, pa llavar la cara?

3º- La gran mayoría de los Espediente de Regulación d’Emplegu (EREs) pautáronlos CC OO y UGT y aprobólos la Conseyería d’Industria y Trabayu del Gobiernu Asturianu (PSOE-IX); polo tanto, l’aumentu alarmante del númberu de paraos foi pola aceptación de CC OO y UGT de los EREs y despidos plantegaos pola patronal.

4º- De xineru a setiembre del 2009 el númberu de trabayadores afeutaos polos EREs ascendió a 13.967 trabayadores, esto ye, 15 veces más que los nueve primeros meses del 2008. La gran mayoría pautólos CC OO y UGT, y estos datos tienen que faemos reflexonar sobre’l desastre SOCIAL que s’avecina.

5º- N’Asturies hai más de 75.000 paraos y nel Estáu superamos los 4 millones, según la encuesta de población activo, y nun hai nenguna perspeutiva nin plan pa solucionar esti problema grave. Mentanto, a los bancos, caxes d’aforros y grandes empreses regaláron-yos miles de millones d’euros del dineru de tolos ciudadanos.

6º- Les Cuenques tamién tán sufriendo deslocalizaciones d’empreses; el casu claru ye’l de Duro Felguera. Amás, tán perdiendo población y la mocedá emigra pola falta de futuru.

7º- Los sindicatos y el gobiernu asturianu tán consintiendo qu’a empreses subvencionaes con dineru público de los fondos mineros se-yos acepten los EREs, los despidos y que se piesllen ensin esixi-yos responsabilidaes. Los fondos mineros tán siendo un auténticu espilfarru.

8º- Somos l’Estáu de la Xunión Europea con más paraos. La media de paru na Xunión Europea ta nel 9% y nel Estáu Español tamos nel 19%, esto ye, tenemos más del doble de paru que la media de la Xunión Europea. Ye bono recordar que’l PSOE prometió la creación de 2 millones d’emplegos pa esta llexislatura, y non de paraos.

9º- Amás de la crisis económica y de sobreproducción del sistema capitalista en xeneral, n’Asturies y el restu l’Estáu padecemos la especulación urbanística; d’ella son responsables los Conceyos, los gobiernos asturianos, el gobiernu del Estáu y la patronal del lladriyu.

Tamién queremos dexar claro que la crisis nun ye pasaxera y que lo peor ta por llegar. La clas trabayadora asturiana tien que s’enfrentar al esmantelamientu de les Cuenques y d’Asturies y a la desesperación de los miles de trabayadores y xóvenes. Tenemos qu’esixir ASISTENCIES INDEFINÍES pa los paraos y RENTA BÁSICA pa la mocedá, yá que la crisis pa los trabayadores y ciudadanos va ser llarga. Hai muncho que faer n’Asturies y nes Cuenques. Esmantelaron el campu asturianu; nesta crisis y p’asegurar l’alimentación a los ciudadanos hai que recuperar el campu.

Anque critiquemos a los sindicatos CC OO y UGT vamos participar na manifestación pa esixir más movilizaciones escontra la patronal y el so gobiernu y en defensa de los intereses de los trabayadores de les Cuenques y d’Asturies.

NON al esmantelamientu de les Cuenques. Llevamos más de 30 años de crisis.

ASISTENCIES DE PARU INDEFINÍES Y RENTA BÁSICA pa la mocedá y ciudadanos.