Énte la manifestación del 24 de payares

Lleer versión en castellán

Seición Comarcal de la Corriente Sindical d’Izquierda nel Valle del Nalón

19-11-2009 La Seición Comarcal de CSI nel Valle del Nalón quier mostrar la so disconformidá colos sindicatos convocantes de la manifestación del 24 de payares. Que participemos na movilización nun implica de nenguna manera que compartamos los plantegamientos que CC OO, UGT y USO ponen enriba la mesa.

Somos eses persones qu’en pallabres del secretariu de CC OO nel Nalón pensamos que “les coses puen faese meyor”, non solo a nivel políticu; tamién los sindicatos llamaos mayoritarios tienen una responsabilidá clara na situación actual nel Estáu Español. Llacayos del gobiernu del PSOE, evitaron movilizase escontra los efeutos de la crisis pa la clas trabayadora y nun faen otro que recibir los güelpes ensin plantegar respuesta dala pa nun s’enfrentar a quien-yos da de comer. Nun entendemos la tranquilidá con que se sienten a negociar regulaciones y cientos de despidos n’empreses con beneficios y persubvencionaes con dineru público; ñegámosmos a formar parte d’esi “sindicalismu responsable” qu’actúa d’árbitru ente empresarios y trabayadores nun partíu desigual, con un resultáu decidíu d’antemano.

Enfotámosmos nun sindicalismu combativu, d’oposición de los nuesos intereses a los de la patronal, nuna llucha de defensa dafechu de los nuesos drechos na que’l Sindicatu sía la ferramienta principal. El Sindicatu con mayúscules, y non el sindicalista profesional metíu nel despachu y perpetuáu nel cargu, ensin contautu cola realidá llaboral. Enfotámosmos nun modelu sindical ensin lliberaos, nel que cada trabayador sía’l so propiu sindicalista, conoza los sos drechos y los defenda con uñes y dientes frente al patrón.

No referente a la manifestación, la convocatoria inicial motivóla’l despidu d’un sindicalista de CC OO nel taller de Barros, por estensión y énte l’anunciu d’un ERE en Felguera Melt, abarcábase l’esmantelamientu de l’actividá industrial de Duro na Cuenca y, a la final, convirtióse, por necesidá, nuna defensa xeneral de les Cuenques Mineres “énte la crisis económica”. Un asuntu, el de Duro, que poco o nada tien que ver cola crisis, non con esta crisis, sinón con otra previa que les Cuenques lleven padeciendo más de 30 años y na que’l papel que xugaron estos sindicatos como xestores del desastre social dexa muncho que desear. Lo mesmo se podría dicir d’Alas Aluminum, Diasa y munches otres empreses creaes con fondos mineros baxo la tutela de los sindicatos convocantes, como parte de la supuesta “reactivación industrial” y qu’agora, n’agotándose la subvención, agótase tamién el proyeutu industrial.

Pa estes empreses la crisis nun ye más qu’una sida pa siguir robando dineru público mientres manden al paru a cientos de trabayadores. Una muestra más del panorama desolador que’l piesllu pautáu de los pozos mineros dexó nunes Cuenques que necesiten percima too una reactivación social, la recuperación de la conciencia de clas perdida tres años de traiciones, frustraciones y desengaños, qu’en munchos casos tienen como culpables a les organizaciones qu’agora mos llamen a manifestamos.

Vamos participar na manifestación col nuesu mensaxe de reactivación social de les Cuenques Mineres, pa que los trabayadores que piensen que “les coses puen faese meyor” se xunan a nós na defensa dafechu y ensin concesiones de la clas trabayadora, denunciando l’actitú d’un gobiernu que pretende que la crisis la paguemos nós y d’unos sindicatos que se rixen por intereses partidistes que nun tienen gota que ver colos de los propios afiliaos.

30 AÑOS DE CRISIS ABASTEN, !!!REACTIVACIÓN SOCIAL YÁ¡¡¡