|
Non a la Llei d’Evaluación del Profesoráu Estaya de l'Alministración Pública 21-12-2009 Güei tamos movilizándomos escontra la Llei d’Evaluación del Profesoráu. Esta llei ta dientro d’un marcu más global, el de modificación de les condiciones de trabayu de les emplegaes y emplegaos públicos. El procesu entamáu’l 27 d’avientu col alcuerdu ente’l gobiernu y los sindicatos mayoritarios llevómos a una situación nueva. Per un llau, la contraprestación económica pola "incorporación a carrera" introduxo la división nel coleutivu. L’accesu a los supuestos drechos ta vetáu pa tou aquel que nun cumpla ciertes condiciones yá conocíes: 5 años de funcionariu de carrera na comunidá autónoma. Les diferencies ente cuerpos dan un saltu cualitativu, dende los 1600 € del grupu 8 a los 2500 € del grupu A, y nel conxuntu del funcionariáu dende los 650 € del grupu E a los 3000 € del A d’estatutarios. El profesoráu asturiano sigue deshomologáu col conxuntu del Estáu y güei somos los últimos en retribuciones, pero al introducir una vía de progresu retributivu individualizáu desarma la posibilidá d’aición coleutiva nesi sen. Poco puen faer los treslladaos p’ameyorar el poder adquisitivu. Pero esti "drechu" tien una contrapartida evidente, nada ye de baldre, el complementu de carrera va asociáu a una evaluación, el que la supere mantiénlu, el que non, devuelve. Resulta agora irritante pensar nes declaraciones d’ANPE y FETE nes que deslligaben dambes coses. La evaluación ye una manera de llamar con otru nome al control asociáu a carrera, pallabres cabales pa vender la idea na sociedá. Ye fácil dexar cayer que’l funcionariáu trabaya poco y mal y polo tanto habrá qu’apertar un poco y premiar a los que faen bien el trabayu y castigar a los que nun cumplen. Pa l’alministración trátase d’un negociu redondu, desármamos como coleutivu y eso yá ye una primer victoria. Tamos dividíos, pero nun contestu de carrera con diferentes niveles de dificultá creciente y que non toos van superar, va llevamos a la competitividá y al búscate la vida tu mesmu. Na paz del cementeriu van plantegar carga nuevo de trabayu, yá lo saben na empresa privada: meyor pagar hores extra que contratar plantía nuevo. Nos centros yá s’intuye, invádemos la meritocracia, paez que tol mundiu quier apuntase a proyeutos, xeres de coordinación, equipos direutivos... Agora tamién paez importante nun discutir colos superiores, sían del equipu directivu o del cuerpu d’inspeición. Un tercer elementu yá apruz: nun hai que faltar al trabayu a nun ser en casos de fuercia mayor. Como dicía una representante de l’alministración "el que nun trabaya, nun contribúi a los oxetivos”. Pero too esto nun va calmar la fame de la bestia, la prollongación de la xornada nun va tardar muncho. Na carrera sanitaria yá se tien en cuenta como méritu la "prollongación de la xornada ordinaria". Nun estáu de descomposición de l’aición coleutiva cambeos nel calandariu llaboral tamién son posibles (namás agostu ye mes de vacaciones). Por último, nun sistema en que’l máximu nivel de retribuciones algámase al borde de la xubilación, munchos y munches van decidir retrasala más allá de los 60 o incluso los 65. El mundiu que conocíemos paez qu’abanga. A pesar de too, llevamos dos años y mediu lluchando escontra too esto y la llucha va tener que siguir per tiempu. Nesti momentu paez que se barrunta una derrota. L’aprobación de la llei d’evaluación va ser un pasu atrás na nuesa llucha, pero solo un altu nel camín, una batalla perdida, non la guerra. La vía xudicial nun ta agotada, y muncho menos la sindical. Vamos lluchar colos medios que tengamos pa que nun se salgan cola suya. Nesti momentu críticu y énte la posibilidá d’apertura d’un plazu nuevu, yá lo dicimos bien claro. Porque la "carrera" ye un pasu atrás nos drechos llaborales, NÓS NUN FIRMAMOS
|