Vamos xubilamos más tarde, la pensión va ser más pequeña

Leer versión en castellano

Estaya de l'Alministración Pública

13-02-2010

Lo que propón el Gobiernu

El 29 de xineru del 2010 pasáu, el Conseyu de Ministros aprobó una declaración política sobre lo qu’ellos llamen “l’universu de la proteición social”, que pue “traducise nel plazu más curtiu posible en reformes llegales concretes”. La “declaración” muéstrase perpartidaria d’introducir modificaciones nel réxime xurídicu de les asistencies de Seguridá Social, con una serie d’intereses escondíos mui concretos en favor d’una reforma neoconservadora que pue que constituya’l mayor retrocesu na proteición de los trabayadores desque aportó la democracia. En xeneral, pue afirmase que’l documentu al que mos referimos ta al serviciu de dos grandes oxetivos: abrir al mercáu’l sistema español de proteición social, aumentando y estendiendo la importancia de la previsión social complementaria que se desarrolla nel ámbitu priváu, esto ye, acutando “un papel reforzáu pa la previsión social complementaria en rellación cola pensión por xubilación”. El segundu oxetivu, complementariu del anterior y perxuníu a elli, consiste n’establecer restricciones suxetives y limitaciones oxetives nel réxime d’accesu o d’esfrute de determinaes rentes, sobre too, anque non solo, la pensión económica por causa de xubilación. Ta claro, lo primero que señala la “declaración” ye la necesidá d’aumentar la edá de xubilación establecida llegalmente “dende los 65 hasta los 67 años”, nun procesu gradual y progresivu qu’escomenzaría nel añu 2013 y que se vería nel cuadru siguiente:

Amás, la “Declaración” defendía l’ampliación del periodu de cotización que se considera pa calcular la base reguladora de la pensión de xubilación, lo que podría traducise nuna disminución apreciable de la cuantía de la pensión pa una mayoría de trabayadores que consiguen meyores salarios nel últimu periodu de la carrera profesional. Acordies cola so desconcertante y poco seria política d’amagar y nun dar, d’amenazar y retirar, a los pocos díes el gobiernu retiró esta propuesta. Lo que pueda asoceder a la final con ella sigue siendo una incógnita.

Lo que significa la propuesta del gobiernu: roben los pensionistes, non los bancos.

Como se pue ver, la “declaración” del executivu nun queda en proponer una “adaptación” o “axuste” del réxime xurídicu de la pensión de xubilación a cencielles, sinón que pon enriba la mesa una estratexa calculada y diseñada pa reducir la cobertura del sistema de Seguridá Social frente a la situación de necesidá conocida como xubilación. La matización del gobiernu de que les midíes anteriores s’apliquen de manera gradual y amodo solo pretende, en realidá, dilir les consecuencies sociales que va provocar una reforma económica de corte radical y antigarantista, pa que la reaición de la población sía más contenida y acabe por desdibuxase col pasu’l tiempu.

La “Declaración”, que mereció l’aplausu inmediatu de la patronal y los banqueros, plantega l’endurecimientu de les condiciones que permiten l’accesu a la pensión contributiva de xubilación y dexa ver la intención de reducir la cuantía a recibir. Pero, más alló de too eso, el documentu aprobáu pol gobiernu representa un alliniamientu claru coles tendencies más radicales que defenden la ruptura del modelu públicu de proteición social vixente nel nuesu país, acercándomos a un escenariu que se carauterizaría por dos rasgos significativos: UNA SEGURIDÁ SOCIAL PÚBLICA MUI DEBILITADA, DE NATURALEZA CRECIENTEMENTE ASISTENCIAL, Y UNA PROTEICIÓN COMPLEMENTARIA QUE S’ENCOMIENDA A LA INICIATIVA PRIVADA Y AL ESFUERCIU INDIVIDUAL DE LOS / LES TRABAYADORES.

¿Esto ye un fechu aislláu? ¿Qué hai detrás?

Pero estes midíes nun son daqué aisllao o qu’aprució nun momentu de fiebre del nuesu presidente Zapatero. Non, esto enmárcase nuna política de recortes de drechos pa la clas trabayadora que tien como perfeuta escusa la crisis financiera que travesamos, y que tien unos culpables clarísimos.

La crisis económica actual, una de tantes cícliques a les que mos tien avezaos el capitalismu, provocáronla los grandes especuladores, buscadores de dineru rápido y fácil, creadores de fortunes sobre castiellos de naipes qu’esbarrumben en cuantes sopla un airín.

N’España asistimos a un aumentu xabaz del númberu de paraos, a que piesllen de siguío empreses, a que se multipliquen los Espedientes de Regulación d’Emplegu que suponen el despidu de miles de trabayadores. N’Asturies yá son 80.000 los paraos y paraes rexistraos nes Oficines d’Emplegu (4 millones n’España), munchos d’ellos yá empicipien a ver cómo s’agoten les ayudes y s’asomen a la indixencia, ensin nenguna mira nel plazu curtiu de que les coses vayan camudar.

Eso sí, el Bancu Santander ta acabante espublizar la cuenta de beneficios, na que batió récores nuevos, ganando más que nunca.

El gobiernu “socialista” yá decidió qué faer y, una vegada más, paez-y que tienen que ser les y los trabayadores a quien hai que penalizar a la hora de pagar les consecuencies d’esta crisis que nós nun xeneremos. Nel so momentu punxéronse miles de millones d’euros a disposición de los bancos pa cubrir les sos posibles perdes y agora pretenden realizar reformes na llinia de lo que planteguen la patronal y el Bancu España: aumentar la edá de xubilación a los 67 años, ampliar el cómputu pa calcular la pensión y reformar el mercáu llaboral con abaratamientu del despidu nel camín hacia’l despidu llibre, que ye la pretensión última de la CEOE. Por desgracia, la propuesta de reforma llaboral presentada apocayá pol gobiernu a la patronal y al sindicatu institucional UGT/CCOO, yá cuntó col preste d’éstos, que solo opunxeron pequeños matices.

Toes estes propuestes van nun mesmu sen, el d’empeorar les condiciones de vida de los y les trabayadores, retrasando la fin de la vida llaboral, menguando les cantidaes que van percibir na pensión de xubilación dempués de toa una vida de trabayu y cotización y prostituyendo entá más el mercáu llaboral, facilitando’l que los empresarios puedan despidir tovía con menos estorbises de les que yá tienen agora, que son bien poques.

Un gobiernu que se diz d’esquierdes quier faer recayer de nuevo’l pesu de la crisis enriba los costinos de los de siempre, porque nun s’atreve a enfrentase a los que causaron daveres esta situación: los bancos, los entramaos financieros, que non solo se safen de responsabilidaes, sinón que, como bonos usureros, aprovechen pa faer entá más negociu adaptándose a les condiciones nueves qu’ofrecen los mercaos.

Un gobiernu d’esquierdes tendría qu’establecer unos impuestos sobre los beneficios enormes d’estes compañíes, tendría que persiguir a les empreses qu’usen el fraude contractual de manera permanente pa esplotar a los y les trabayadores y aprovechase de les subvenciones, tendría que gravar les grandes fortunes d’esti país, llograes a costa del esfuerciu de los que nun tienen otru bien económicu que la fuercia del trabayu. Un gobiernu d’esquierdes tendría qu’espropiar vía impuestos direutos sobre’l capital los beneficios escandalosos declaraos pola Banca y les grandes empreses multinacionales españoles, pa d’esa miente recaldar fondos abondos pa faer frente a les necesidaes de la población española en situación de probitú intensa.

¿Qué faer?

Dende’l nuesu puntu de vista, la “declaración” del gobiernu constitúi un ataque de tal caláu que la clas obrera, a traviés de les organizaciones representatives, tien que s’oponer a esta ofensiva procediendo a la convocatoria d’una fuelga xeneral. LA SEGURIDÁ SOCIAL DE LES Y LOS TRABAYADORES TA EN PELIGRU. Nun podemos consentir que, cola escusa de la crisis, se produza retrocesu dalu nos drechos de los y les trabayadores, que tanto costó algamar. Ye posible otra política económica, nun asumamos el discursu únicu, nel que consiguir beneficiu xustifícalo too. Resistamos énte esta ofensiva nueva del capital.

csi@princast.es