El conflictu del alambrón

Leer versión en castellano

CSI - Arcelor

Febrero 2010. El cuatro de febreru fírmase l’acta d’alcuerdu sobre la reorganización del Tren d’Alambrón avaláu por UGT y l’OTRU sindicatu, qu’una vez más torguen que se convoque una asamblea pa informar y un referéndum pa decidir.

Básicamente y espresao nun llinguaxe coloquial la cosa consiste n’echar a 32 persones y que’l restu s’esllombe un poco más pa mayor “gloria” de la cartía d’aforros del “Amu”.

Como coartada pa los firmantes y fórmula d’engrase pal personal ye posible, si s’acepta, ganar “unes perres” siempre y cuando l’operariu, n’acabando les práutiques correspondientes, faiga ver al mandu que ye competitivu por demás, arriendes de llistu como la fame, y polo tanto que ta en condiciones de cobrar eses “perres”; claro qu’empara de vender puestos de trabayu que nun son suyos.

L’argumentu d’UGT (con unos dirixentes qu’amuesen una y otra vez una querencia esmolecedora a facilitar la “vida” al “Amu” —y viceversa—) y de los dirixentes del OTRU sindicatu (qu’actúen sindicalmente como tontos útiles en manes d’UGT y del “Amu” y a los que nun los salva más que la so difusa ideoloxía y los sos non menos difusos principios sindicales) ye que los sos afiliaos tán conformes col alcuerdu.

L’argumentu d’entrambes organizaciones sedría correctu si lo firmao afectare o fuere d’aplicación namás qu’a los sos afiliaos; casu en que nun habría res que dicir. Pero cuando firmen como Comité d’Empresa la cosa cambia, porque lo firmao implica non solo a los sos afiliaos sinón tamién al conxuntu de trabayadores del tren, tean o non afiliaos; y por eso ye que, amás de nun ser válidu, l’argumentu ye una impostura sindical.

Toles persones tienen drechu a que les informen y a decidir de manera coleutiva, y ye’l Comité d’Empresa’l que tien el deber d’informar y facilitar la decisión de los trabayadores.

Fartos yá de tar fartos, los compañeros del Alambrón recoyeren firmes yá antes de los fechos del día cuatro, esixendo del Comité que se celebrare un referéndum; tamién mencionaben que, nel casu de que nun se celebrare, taben dispuestos a convocar paros de dos hores per turnu nos meses de febreru y marzu.

Como quiera que lo mesmo una organización que la otra (dambes suponen la mayoría del Comité d’Empresa) se ñeguen a convocar la consulta, CC.OO. y La Corriente deciden facilitar la decisión de los firmantes, UNA MAYORÍA AMPLIA, asumiendo la convocatoria de los paros. Paros que van escomenzar el día 15.