Los planes que vienen

Enero 2010. A un “Plan” siempre-y sigue otru “Plan”, con carauterístiques comunes, que son, davezu y fundamentalmente, reducir costos salariales y eliminar puestos de trabayu. Toos suponen aumentos de productividá que permiten fabricar más barato y consiguir con ello más beneficios; claro qu’a base d’esplotar más a los de dientro y ñegar el futuru a los de fuera. Por supuesto, van conceder dalgún “nivelín” o plus qu’actúe como engrasante pal personal y como coartada pa los “axentes sociales”. Cualesquier empresa, mayormente si falamos d’una multinacional, pue “fabricar” planes como Noreña fabrica chorizos y agora la multinacional “regálamos” trés, a saber:

PLAN INDUSTRIAL. Entá ensin entregar, a pesar de ser el más importante. Nelli tienen, tendríen, que figurar qué proyeutos y qué inversiones se van desarrollar a curtiu y mediu plazu. Pero cudiao, con proyeutos, consignaciones económiques pal desarrollu d’esos proyeutos y plazos d’execución. Si nun ye asina nun van ser más que pures intenciones.

PLAN DE REORGANIZACIÓN. Baxo esta denominación nun s’escuende otro qu’eliminar puestos de trabayu y aumentar la productividá. De la que tamos ellaborando esti comunicáu nun sabemos si yá hebo una presentación formal, pero informámoste que yá se ta reorganizando’l Tren d’Alambrón y la propuesta de la patronal consiste en reducir 69 puestos, y ello nuna instalación con ritmos de productividá yá aforfugantes. Hai que cuntar con que, cuando presenten reducir 69, tán pensando en 45 o 50, pola necesidá de que los “axentes firmantes” tengan una coartada pa qu’asina, enseñando “los pelos del pechu”, puedan dirixise a los sos representaos diciendo: ¡Veis, la empresa quería quitar 69 y consiguimos que solo quite 50! Tamién ye probable qu’escuches a dalgún mamporreru sindical, de procesión selmanal pela instalación, dicir la típica cantinela: ¡Ye que si nun firmamos, esto pieslla! ¿A que sí, a que yá lo oyisti?

PLAN DE MANTENIMIENTU. Más de lo mesmo. Equí trátase d’acabar col ruin mantenimientu a turnos de la manera siguiente: apaición del OPERADOR-MANTENEDOR; personal de producción que, como figura nel propiu plan, va asumir funciones de mantenimientu; ye la persona que primero “ataca” l’avería. MANTENEDOR-OPERADOR; personal de mantenimintu que pasa a depender xerárquicamente de producción y que, amás de les sos funciones pue cubrir puestos de producción; ye’l segundu “atacante” de l’avería. EQUIPU DE RETÉN; si a los dos anteriores los “derrota” l’avería, estos sedríen “l’exércitu de salvación”. Una parte importante del cuasi inesistente personal de mantenimientu a turnos va pasar a "JN" pa potenciar (eso dicen) el mantenimientu preventivu, cola peculiaridá de les guardies. Esti personal ye probable que nun primer momentu se sienta encantao, yá que dexa los turnos y amás pasa a cobrar el conceptu de guardia; ye probable qu’esi “encantamientu” nun dure’l primer mes, yá que, tal como tán les instalaciones, va sali-yos más rentable mudase a vivir a la propia fábrica. GRUISTES; pa ellos el plan tien un apartáu específicu de dos folios nos que la multinacional desarrolla toles funciones que tendrán qu’asumir n’entrando en vigor el “Plan”.

El “Plan” van “cuchalu” con una montonera cursos de formación fuera de xornada y a mil “pesetines” la hora, la hora estra, sí, porque tolo que ta fuera de la xornada son hores estra. Nun se t’escapará que col “Plan” nun se persigue ameyorar el mantenimientu, sinón eliminar puestos pa consiguir más beneficios y que, de siguir alantre con elli, como cualquiera que trabaye nel taller sabe, va suponer un deterioru tovía mayor de les instalaciones.

Esto ye lo que La Corriente sabe de los trés planes y cuntámostelo porque tienes drechu a tar informáu, a discutilo y a decidir sobre ello. Son otros los que te ñeguen esi drechu y a ti ye a quien-y correspuende esixilu.