|
El conflictu del Sinter Febrero 2010. Los compañeros del Sínter llevaron a cabu paros de dos hores per turnu durante la última quincena de xineru y la primer selmana d’esti mes reivindicando lo recoyío nel “Plan” Arcu”: plus de xefatura d’equipu y un grau salarial más, qu’hasta’l día de güei la empresa ñégase a cumplir. Estos compañeros recoyeron firmes solicitando al plenu del Comité d’Empresa la convocatoria d’una asamblea pa decidir qué posición tomar énte la falta de cumplimientu de la empresa y mira pa ehí, qu’otra vez UGT y l’OTRU sindicatu, a pesar de ser firmantes del “Plan”, torgaron la celebración d’esa asamblea. Nuna asamblea xeneral convocada por CC.OO. la mayoría de los trabayadores del Sínter decidieron convocar paros de dos hores per turnu esixendo’l cumplimientu de lo prometío nel mencionáu Arcu, cuestión qu’asume esa organización y que convoca los paros. Como la empresa sigue ensin dar una respuesta y como de los firmantes nun se sabe un vierbu, los compañeros decidieron ampliar los paros a cuatro hores. La Corriente, a pesar de que lo mesmo CC.OO. que los compañeros nun se dirixeron a esta organización en nengún momentu, asumimos la so decisión y polo tanto les sos reivindicaciones como propies.
|