|
Nenguna espulsión dende Asturies. Non a la llei d’estranxería
Febrero 2010. N’Asturies nun fexo falta que’l Ministeriu del Interior mandare, el 25 de xineru, una orde a les comisaríes tovía más dura que mesmamente la reforma de la Llei d’Estranxería. Si la publicación d’esa orde —que pretendía mantenese en secretu— supunxo un escándalu pola vulneración de drechos fundamentales qu’implica —detenciones preventives, espulsiones “esprés”, etc—, n’Uviéu, Xixón y otres poblaciones asturianes la Delegación del Gobiernu, encabezada por Antonio Trevín, anticipóse a les órdenes ministeriales: dende l’empiezu del 2010 les redaes policiales y el mandar a inmigrantes pa Centros d’Internamientu d’Estranxeros recrudecióse. A lo menos foron decenes —tarrecemos que munches más— les persones que mandaron pal CIE d’Aluche (Madrid), pal de Zona Franca (Barcelona) o pa otros CIEs pa tramitar la espulsión. Tenemos testimonios abondos de persones que les enzarraron nel calabozu anque yá se taben tramitando los papeles; de mozos a los que nun se-yos atendió’l so drechu a un abogáu hasta 28 hores dempués de la detención; d’inmigrantes llevaos a rastres —pel suelu— dempués de que’l xulgáu decidiera l’internamientu. La ventena de coleutivos sociales, sindicales y políticos que conformamos la Ruta escontra’l Racismu y la Represión denunciamos les persecuciones policiales racistes y anunciamos una respuesta social escontra la mesma: nes selmanes vinientes vamos realizar aiciones informatives diverses al respeutive d’estes actuaciones y escontra la llexislación d’estranxería; y el sábadu 6 de marzu convocamos una manifestación que va salir, a les 13 h, de la Estación de Renfe d’Uviéu. Per otru llau, la Ruta escontra’l Racismu y la Represión solidarízase una vez más con Claudio Maturana y Luis Egaña, los dos inmigrantes paraguayos que sufrieron l’amenaza d’espulsión por defender los sos drechos y demandar al empresariu que los esplotaba na economía somorguiada. Reiteramos la nuesa esixencia —énte la próxima sentencia referente a la espulsión de Luis y l’inminente xuiciu a la empresa Escenasant S.L. por parte de Claudio— de que se-yos conceda a dambos el permisu de residencia y trabayu.
|
Ruta contra'l racismu y la represión