Nenguna espulsión dende Asturies. Non a la llei d’estranxería

06-03-2010. Ruta contra'l racismu y la represión

Nos últimos meses, dende l’aprobación de la reforma de la Llei d’Estranxería a finales del 2009 hasta “l’escándalu” reciente pola cuestión de los empadronamientos en Vic, asistimos a un episodiu nuevu de la competición política ente’l PP y el PSOE pa ver quién ye’l más duru: quién persigue, detién, enzarra y espulsa más inmigrantes. Pa ello multiplicaron una y otra vez los efeutivos policiales, les rexes, los sistemes de vixilancia. Y nesta competición per agora gana’l PSOE de Zapatero, de Rubalcaba, de Trevín… Nunca antes se detuviera y espulsara a tanta xente por nun tener papeles.

“Prohibir l’empadronamientu”, “los españoles primero”, “espulsar a tolos ensin papeles”, “construyir más centros d’internamientu”... Énte la obscenidá de les declaraciones polítiques –y énte la hipocresía na que se mueve’l gobiernu– lo primero qu’esiximos ye que callen. Sí, un poco de silenciu ente tanta miseria parllamentaria pa poder falar sobre les causes verdaderes de la inmigración y sobre’l sentíu verdaderu de la política migratoria.

Falemos de les causes. Porque más qu’un efeutu llamada lo que se produxo, lo que se ta produciendo, ye un efeutu fuxida de poblaciones a les que se-yos ñegó en socesives ocasiones la posibilidá de construyir la propia soberanía alimentaria. Apocayá asistimos a la conversión de los pirates somalinos en terroristes malvaos. Pero, ¿qué tendríen que faer los pescadores somalinos, senegaleses, mauritanos, saharauis, marroquinos? ¿Qué tendríen que faer los inmigrantes llatinoamericanos espulsaos de los sos países pola segunda colonización, esta vez la de les multinacionales españoles, europees, estaoxunienses...? ¿Aceptar que los humilden nel aeropuertu o los enzarren nun CIE al llegar per mar? ¿Aceptar que los esploten na economía llegal o na somorguiada? ¿Asumir como naturales los controles racistes peles cais? ¿Tienen que callar cuando los internen y, a la fin, los espulsen? Pue ser qu’a lo que’l capitalismu español ta invitando con tanta esplotación y represión ye al aumentu de los pirates, a que los pueblos s’organicen nos países d’orixe y espulsen a los invasores verdaderos: les empreses espoliadores de los recursos de los pueblos. Va ser esti un bon puntu de partida pa construyir una verdadera llibertá de movimientos: la qu’empicipia porque nun t’espulsen de la to propia casa.

Volvamos a Rubalcaba, a Trevín, a les espulsiones. Nel Estáu español hai nueve Centros d’Internamientu d’Estranxeros. Informes recientes de varies organizaciones sociales demuestren la vulneración de drechos fundamentales nestos centros, peores qu’alcárceles. Celdes d’aisllamientu, maltratos y tortures policiales, condiciones de vida insalubres, etc. Pero nun fai falta acudir a Aluche en Madrid, a Zapadores en Valencia, a Capuchinos en Málaga. Val con dar una vuelta per Uviéu o Xixón. Val con escuchar los testimonios de centenares, de miles de persones, que sufrieron un control policial racista, que tuvieron que tragar con delles nueches de calabozu o incluso que los golpió la policía por ser inmigrantes. Dende hai meses, tolos díes, hai persones n’Asturies que les detienen y les internen pa espulsales. Como acabamos d’escuchar, la ciudá conviértese nuna alcárcel pa les persones ensin papeles. Hai quince díes manifestábemosmos equí mesmo escontra la ordenanza de convivencia ciudadana que pretende aprobar el gobiernu de Gabino de Lorenzo. El mesmu que tien un xefe de policía que se dedica a llimpiar les cais d’inmigrantes. Güei les cais son pa lo que son: pa circular y pa consumir. Tamos equí pa ñegar la ciudá alcárcel, pa ñegar la ciudá centru comercial, pa reclamar les cais, pa ocupar l’espaciu públicu. Inmigrantes, prostitutes, mocedá, activistes, méndigos. La cai nun ye de la policía y les multinacionales. La cai ye de nueso.

¿Cuál ye’l sentíu verdaderu d’esti estáu d’esceición escontra los inmigrantes? ¿Pa qué-y sirve al Estáu? Pa espulsar a más de diez mil tolos años –diríen Rubalcaba o Trevín–. Pero la población inmigrante nel Estáu español ye de 5,6 millones de persones. Espulsar a 10 mil o a 13 mil nun ye una midida pa regular los fluxos migratorios. Eso ye mentira. Ye una midida pa xenerar mieu, inseguridá, non solo a les persones deteníes sinón a les millones de persones inmigrantes que podríen llegar a sufrir una espulsión. Ye una midida exemplarizante, pa que los inmigrantes depriendan bien el papel: la sumisión, l’aceptar cualquier condición llaboral, p’asina poder tener tarxeta de residencia. La Llei d’Estranxería y la represión policial pon a los pies del mercáu de trabayu a una población sumiso y vulnerable.

Una población que ye invisible nun siendo cuando se lo rellaciona cola criminalidá o col gastu escesivu en servicios sociales. Otres mentires. Lo que nun se diz ye que güei equí –y en toa Europa dende hai décades– la población inmigrante ye imprescindible. Más si cabe n’Asturies. Qué paradoxa: mientres Asturies se despuebla, espúlsase a los inmigrantes. Y dizse que quiten el trabayu a la población autóctono. ¿Quién va faer –por exemplu– el trabayu de cuidaos que güei realicen mayoritariamente les muyeres inmigrantes? 2.300 d’elles tán daes d’alta nel miserable Réxime Especial d’Emplegaes de Casa. Y munches más trabayen ensin contratu.

Güei nun vamos cambiar la Llei d’Estranxería. Güei nun vamos pesllar los CIEs. Güei nun vamos sacar del calabozu a los inmigrantes que seguro que tán enzarraos nelli. Pero güei tamos dando un pasu al frente, tamos texendo rellaciones nueves de solidaridá y apoyu mutuu. Güei, por exemplu, vinieron compañeros del coleutivu d’africanos d’Avilés, porque fuimos alcontrándomos nesta llucha. Por eso güei yá somos un poco más fuertes.

Esta manifestación nun ye namás una manifestación d’apoyu a la población inmigrante. Que l’estáu d’esceición se convierta en natural ye un problema que mos afeuta a toles persones, migrantes y autóctones. ¿Vamos zarrar los güeyos, vamos mirar pa otru llau, mientres permitimos que la policía de Trevín actúe cobarde ya impunemente peles cais de les nueses ciudaes y pueblos? Inmigrantes y autóctonos yá nun somos compartimentos estancos. Conocémosmos, amestámosmos, tocámosmos. Construyimos hestories en común nes nueses families y los nuesos barrios. Non, nun tamos equí namás pa dar un paséu y desfogar el nuesu drechu a espatuxar. Tamos equí pa dici-y a De Luis, a De Lorenzo, a Trevín, a Rubalcaba, a Zapatero y a tolos miserables que persiguen a la población inmigrante que nun lo vamos permitir. Que nun vamos aparar hasta qu’acabe esta persecución y ensañamientu.