|
Rellatu d’una persona inmigrante "ensin papeles"
Llámome Mam Goor, pero equí llámenmos inmigrantes “ensin papeles”. Vivo equí nun pisu d’alquiler colos mios compatriotes n’Uviéu, ciudá de los mios suaños pero que se tresformó de sópitu nuna alcárcel grande pa min, pero tamién pa toos ellos. El nuesu suañu yera buscamos la vida equí y mantener a les families que dexemos nel país. Delles veces quedo munchos díes en casa ensin poder salir. Cada vez me siento más angustiáu, asustáu ya inseguru nel nuesu propiu cuartu cola idea de que la policía pue venir en cualquier momentu pa llevamos. Con esos controles policiales numberosos, usamos como los animales el nuesu instintu de sobrevivencia pa quedar a salvo. Por exemplu, cuando me toca por necesidá salir de casa, tengo qu’estremar les precauciones mirando pa la drecha, la esquierda y delantre por si acaso hai dalgún axente pela contorna. Andando peles cais voi con munchu mieu nes coraes y siempre cola idea de que me puen controlar y detener en cualquier momentu. Cada mañana, quixera salir ceo de casa, igual pa dir a buscar dalgún trabayu, pasiar peles cais, faer deporte o lo más normal de les actividaes humanes, pero nun lo puedo faer porque nun mos dexen. Nes estaciones d’autobuses o de trenes, nin pensar acercase. Porque dende que me detuvieron nes escaleres mecániques de RENFE cuando diba tranquilamente a la mezquita tuvi mui claru’l significáu de “fronteres interiores”. Antes, pela mañana Uviéu taba enllenu de policíes vistíos de paisanos, pero agora ye peor y vergonzoso. Van toos vistíos de ropa de serviciu y al garrate indocumentáu mándente pal cuartón per un par d’hores y d’ehí pa los CIEs y dempués pal to país d’orixe: “l’infiernu”. Si güei venimos equí al primer mundiu ye porque nun hai manera... Cola complicidá de los nuesos gobiernos corruptos, los políticos del norte desaposiáronmos y robáronmos tolos nuesos recursos. Y venimos güei a reclamar una parte d’ello pa vivir dignamente... Venimos güei a lluchar y a glayar fuerte pola defensa de los nuesos drechos y el cese d’esa política de represión y de racismu. Afortunadamente podemos cuntar con toos vosotros, población d’Asturies y d’España, muyeres y homes, adultos y mozos pol vuesu apoyu seguru y el trabayu tremendu que cada día táis desarrollando a nivel individual o asociativu a favor de nós, los “naide”, inmigrantes con o ensin papeles. Munches gracies.
|
