09-08-2010Estaya de l'Alministración Autonómica de la CSI
La puñalada trapera qu’acaben d’asestar PSOE ya IX a l’alministración pública, rebaxando’l sueldu a los emplegaos públicos y recortando les plantíes que tienen que xestionar los servicios públicos daos a los ciudadanos y ciudadanes asturianes, tenía difícil xustificación.
Izquierda Xunida teníalo entá peor dende una óptica d’esquierdes, lo que provocó incluso un cisma internu. Pa intentar salvar la papeleta intenten vender a la opinión pública una supuesta contrapartida: empara d’apoyar al PSOE nesta agresión a los servicios públicos, ellos consiguíen salvar de los recortes la so Conseyería de Bienestar Social y, en concreto, les ayudes a la dependencia. Sicasí, guárdense permuncho de desvelar la realidá y los datos concretos de los vaivenes sufríos pola estrella de la so política social.
Vamos ver esa realidá.
La realidá de la Seición d’Asistencies a la Dependencia
Pa empecipiar unos datos. La Seición d’Asistencies a la Dependencia compónenla 12 persones, que dende l’empiezu de l’aplicación de la Llei de Dependencia (payares del 2007) xestionaron más de 30.000 espedientes.
Nesi tiempu hebo les ayudes siguientes en cuantes a volume de personal:
- Nel 2008 trés meses de contratu cola empresa semipública SERPA (xunu a setiembre).
- Nel 2009 contratáronse por acumulación de xeres 10 persones (5 auxiliares y 5 alministratives) de setiembre a avientu. Prorrogóse esi contratu hasta febreru del 2010.
- N’abril d’esti añu volvió facese otru contratu d’acúmulos de les mesmes carauterístiques (pero con persones diferentes, a les qu’hebo qu’organizar y enseñar de nueves), y cuando a los trés meses s’acabó esi contratu, anque dende la propia Conseyería se dixo que se diba prorrogar otros trés meses (había dineru pa ello), la Direición Xeneral de Función Pública denególo. A partir del 12 de xunu, la seición volvió a tar compuesta namás que poles 12 persones iniciales, col consiguiente desastre na organización de les diferentes xeres.
Autorizóse a faer hores del 12 al 30 de xunu, pa grabar espedientes na aplicación informática estatal, y asina recabar financiación del gobiernu central n’atención al volume d’espedientes. Hai que dicir, amás, qu’eses hores aprovecháronse tamién pa sacar otros trabayos.
La postura de la conseyera
Ello ye que, en rueda de prensa (30 de xunu), la conseyera de Bienestar Social "presumía" de la cantidá d’espedientes que se sacaren esi mes, ensin aclarar que fuera a costa d’eses hores estres. Lo que consiguió con ello foi nin más nin menos que poner a los emplegaos públicos a los pies de los caballos de la opinión pública: nun había más qu’entrar nos foros d’opinión de los periódicos dixitales, nos que se comprobaba que la idea que calara ente la ciudadanía yera a cencielles qu’estos emplegaos teníen que tener trabayao a esi ritmu’l restu l’añu. Lo que nun se tuvo a bien tresmitir a esa opinión pública foi l’esfuerciu tremendu d’esti personal, que con cuasi la metá d’efeutivos y volcándose nel trabayu a xornada completa solucionó lo que los responsables políticos nun faen más qu’estropiar. Conclusión: pa salvar la cara políticamente déxase col culu al aire al personal que col so esfuerciu-yos soluciona l’enguedeyu.
¿Pero nun dicíen que nun diba haber recortes?
Pero hai más. De mano taba previsto crear 6 places pa reforzar la seición. Agora enterámosmos de que, daveres, namás van ser 3, porque les otres van destinase a otres seiciones de la Conseyería (Salariu Social y PNC).
Y p’acabu, otra de les miseries del pautu PSOE-IX de xunetu: IX asumía el “tisoriazu” empara, ente otres coses, de "evitar formalmente que se recorten les partíes destinaes a la Llei de Dependencia y a polítiques sociales" (pallabres testuales). Pues bien, la opinión pública tien que saber que toles Árees Sociales Territoriales sufrieron recortes graves de personal nes últimes selmanes. Estes árees (en númberu d’ocho y organizaes por criterios xeográficos) tienen un papel fundamental na xestión de les asistencies de dependencia, yá que son les que s’encarguen de xestionar les solicitúes que-yos vienen de los servicios sociales de los Conceyos, de les visites nes cases pa ver el grau y nivel de dependencia de la persona interesada; y tamién (en tando evaluada económicamente esa dependencia dende la Seición de Dependencia) de ponese en contautu cola familia pa negociar con ella los distintos servicios d’ayuda. Nel casu de les árees centrales (Uviéu, Xixón, Avilés y les Cuenques), el retrasu d’estes xestiones yera mui grave, situación que con esti recorte va llegar a unos estremos vergoñosos daveres.
Conclusión
Esti análisis de les polítiques sociales nel Principáu dexa mui mal a Izquierda Xunida, prisionera de les sos urxencies y necesidaes económiques, obligada a “tocar poder” pa sobrevivir, y teniendo que s’escaecer de contino del so programa y de los sos principios y dando la espalda a los trabayadores qu’acuden a solicitar el so apoyu. Los emplegaos públicos somos l’últimu pasu que baxaron nesta escalera al abismu, y nun escaecemos.