ESCONTRA LOS RECORTES Y LA REFORMA LLABORAL DEL P$OE 14-08-2010 Conceyu Trabajadores Escontra la Cris Capitalista. Sabemos que nel Estáu español hai 5 millones de persones paraes; que n’Asturies ronden les 100.000 y qu’en Xixón son cerca de 30.000. Tamién sabemos que les families españoles con tolos componentes n’edá de trabayar parados algamen les 1.500.000, y que 30.000 son asturianes, incapaces de faer frente a les obligaciones de les cases, al pagu de les hipoteques, del arriendu, de la lluz..., y en riesgu de vese na cai. Con esti panorama’l gobiernu del P$OE pon en marcha les midíes esixíes polos grupos de presión financieros y empresariales españoles, recortando drásticamente les condiciones de vida del pueblu trabayador, aniquilando’l llamáu “Estáu del bienestar” impuestu con más de mediu sieglu de lluches obreres y populares y que naide mos regaló. La banca y la patronal pretenden siguir consiguiendo los mesmos beneficios que nos tiempos económicos bonos, a costa del dineru público y del bolsu de los y les trabayadores. Pa complacelos el gobiernu del P$OE fai más precariu’l mercáu de trabayu y les condiciones llaborales, abarata’l despidu, xube la edá de xubilación a los 67 años, conxela y baxa los sueldos, suprime les pensiones de viudedá y orfandá, reduz les pensiones, y amás suprime o disminúi les inversiones y ayudes públiques... ...Y agora’l Congresu aprueba, colos votos favorables de P$OE y PP, la reforma de les caxes d’aforros, abriendo’l camín de la privatización. El gobiernu del P$OE “regala” a los culpables d’esta crisis los fondos sustanciosos que provienen del aforru popular, y de pasu tamién los 11.200 millones d’euros de dineru público que les caxes lleven recibíos pa la so “salvación”. Tenemos qu’aparar toes estes midíes y convertir la FUELGA XENERAL del 29 de setiembre nel puntu de partida d’una movilización popular que faiga pagar la crisis al culpable verdaderu: el capitalismu especulador, insaciable y xabaz y los sos fieles sirvidores nos gobiernos estatal, autonómicu y llocal. LES Y LOS TRABAYADORES NUN TENEMOS POR QUÉ PAGAR LES DEUDES DE LOS CAPITALISTES, LO MESMO QU’ELLOS NUN REPARTIERON LOS BENEFICIOS. NUN PODEMOS DEXAR QUE LOS RICOS SÍAN CADA VEZ MÁS RICOS Y LOS PROBES CADA VEZ MÁS PROBES. Y POR ESO ESIXIMOS: - QUE SE RETIRE LA REFORMA LLABORAL. - TRABAYU ESTABLE Y DIGNU PA TOES Y TOOS. - SI NUN HAI TRABAYU, ASISTENCIA POR DESEMPLEGU INDEFINIDA. - RENTA BÁSICA UNIVERSAL. DRECHOS BÁSICOS (alimentos, salú, vivienda y educación) GARANTIZAOS POL ESTÁU. - PARALIZACIÓN DE LOS PROCESOS D’EMBARGU Y DESAHUCIU A TRABAYADORES AFEUTAOS Y AFEUTAES POLA CRISIS Y EL DESEMPLEGU. - IMPUESTOS ESPECIALES PA LES FORTUNES GRANDES. ¡29 DE SETIEMBRE: FUELGA XENERAL!
|