La Corriente Sindical d’Izquierda quiere asoleyar la so solidaridá con Rafa Díez, es-secretariu xeneral del sindicatu LAB, y les sos collacies y collacios condergaos a 10 años de prisión pol nomáu “casu Bateragune”.
Pa la CSI, estes condergues apareyen una torga más, una piedra más nel camín del procesu de paz aniciáu pola Izquierda Abertzale n’Euskal Herría.
Con esta sentencia, l’Estáu español asítiase nuna posición imposible de defender, porque la so única rempuesta al procesu de paz ye encarcelar a dirixentes sindicales y políticos comprometíos dende hai años con una alternativa política empobinada a desaniciar d’Euskal Herría cualisquier ximuesa de violencia.
De nada sirvieron los entamos internacionales o del mesmu Partíu Socialista d’Euskadi, que plantegaren “afayar les condergues a la nueva realidá del País Vascu”. De nada sirvió que los propios condergaos fueren la clave nel cambiu d’actitú de la Izquierda Abertzale y que, dende hai tiempu, fueren los llíderes d’un plantegamientu políticu que-y apurrió nueves ales a los naguares de paz del Pueblu Vascu. L’Estáu español fae oyíos sordos a too elloy cualisquier triba d’oposición, por pacífiques que seyan les sos intenciones, ye acusada, reprimía y encarcelada.
Dende tolos ámbetos políticos y xudiciales bombardeásenos costantemente cola idega de que toles alternatives polítiques son llícites si se separta d’elles cualisquier actuación violenta. Pues val, agora condérgase, precísamente, a quienes entamaron, dientru la Izquierda Abertzale, un movimientu políticu ayenu a la violencia y castígase cola cárcele a quienes fueron quien a da-y puxu a un nuevu escenariu de paz pa Euskal Herría.
Dende la CSI, reiteramos una vegada más la nuesa solidaridá pa coles collacies y collacios condergaos y sopelexamos el nuesu compromisu d’engabitar, na midía les nueses posibilidaes, el procesu de paz entamáu pola Izquierda Abertzale n’Euskal Herría.
