Concentración pol despidu de la representante de CSI en "Valoriza"

27-01-2012 CSI Avilés.

El prósimu vienres, 27 de enero, a les 19:00h, la CSI convoca una concentración delantre’l centru xeriátricu de Los Canapés, n’Avilés, pol despidu de la so representante sindical na empresa “Valoriza”.

“Valoriza” ye una empresa subcontratada pol ERA (Establecimientos Residenciales p’Ancianos d’Asturies), muérganu perteneciente a la Conseyería de Bientar Social, y qu’apurre servicios de celaduría, llimpieza y caltenimientu, ente otros, en centros xeriátricos pertenecientes al ERA. Esta empresa, que pertenez al grupu empresarial de Florentino Pérez, tien, n’Avilés, la subcontrata de dos centros xeriátricos públicos: la Residencia Avilés y el Centro Xeriátrico Los Canapés, y la so responsable ye, amás, trabayadora asalariada del ERA (na residencia d’El Naranco) y afiliada al partíu Políticu Foru Asturies.
La representante sindical de la Corriente Sindical d’Izquierda na empresa “Valoriza”, foi despedía’l pasáu vienres 20 de xineru de 2012, cola disculpia, sigún la versión de la empresa, del baxu rendimientu de la trabayadora demientres el mes anterior.
Pero dase la circustancia de que, demientres esa dómina tiempu, la trabayadora atopábase en situación d’Incapacidá Llaboral Transitoria (baxa llaboral) pola mor d’un acidente trabayu, que la empresa nun quier reconocer y pretende facer pasar por una baxa por amalaúra común.

Pa la CSI, les braeres razones d’esti despidu son otres perestremaes:

1-La empresa Valoriza caltién unes condiciones llaborales illegales nel centru xeriátricu de Los Canapés (xeres encomendaes, horarios y calendarios llaborales...), magar que namás lleva dellos meses a cargu de la subcontrata, en sustitución de l’anterior empresa encargada..

2-La representante sindical de la CSI na empresa Valoriza ye trabayadora del nomáu centru xeriátricu de Los Canapés. Previamente, esta trabayadora foi representante sindical de la CSI na anterior empresa alxudicataria de la subcontrata de dichu centru.
3-Darréu d’esta condición de representante sindical, la trabayadora venía calteniendo un procesu de denuncia de les condiciones illegales de trabayu que se tan dando na empresa. Tanto les xeres encomendaes a los y les trabayadores, comu los calendarios llaborales, fáense a caprichu de la responsable de Valoriza n’Avilés, baltando la llexislación llaboral en vigor, inclusu cuandu esiste un requerimientu de la Ispeición de Trabayu empobináu a camudar eses condiciones en talu centru de trabayu y afayales a la llegalidá vixente.

4-Pa la CSI, la empresa Valoriza quier reprimir y castigar a la representante de la CSI pola defensa de los drechos llaborales que taba llevando alantre nel centru Los Canapés. Nun hai dubia de que pa Valoriza, esta trabayadora ye una “torga” que quier desaniciar con un despidu que namás puede pescanciase comu un actu de represión y persecución sindical y comu’l primer pasu de la empresa nel esfarrape y precarización de les condiciones de trabayu.

5-Valoriza actuó, amás, de mala fe. La CSI caltuvo un primer aconceyamientu cola empresa, na que ésta reconoció el so erru nel despidu de la so representante sindical y comprometióse colos representantes sindicales de la CSI a realmitila otra vegada. En llugar d’ello, la trabayadora recibió per corréu una nueva carta na que la empresa Valoriza non solo nun la realmitía, sinon que perafitaba’l so despidu polos mesmos falsos motivos y con nueva fecha.

A too ello han amestase les circustancies de que la representante de CSI ye una presona de 59 años, con una discapacidá reconocida del 50% y tien al so cargu a dellos familiares, ún de los cualos atópase en silla de ruedes.
Por toes estes razones, la CSI considera abiertu esti conflictu y propónse comu finxos la realmisión darréu de la so representante sindical, la recuperanza de los drechos de los y les trabayadores y la normalización de les condiciones llaborales, pa lo cualo nun va dubiar nin un solu intre en remanar tolos preseos xudiciales y de presión social que tea al so alcance.