|
||||||||||||||||||||||||||||||||||||||||||||||||||||||||||||||
Noticies: Xunetu de 2010 |
||||
| SEGURIDÁ LLABORAL: Denuncia por falta de prevención de riesgos llaborales | ||||
30-07-2010 La seición sindical de la CSI en Felguera Construcciones Mecániques interpunxo una denuncia a la empresa –allugada en Llangréu– énte la Inspección de Trabayu. El deterioru manifiestu de les instalaciones y equipos de trabayu y la pasividá con que la dirección de la empresa trata tolo rellacionao cola prevención de riesgos llaborales tán sentando les bases pa qu’aumenten los accidentes y les enfermedaes llaborales nel curtiu plazu. La empresa, que desoi les propuestes realizaes poles trabayadores, amenorgó’l personal dedicáu a la prevención, alegando causes económiques, mientres que l’alministración sigue ensin tomar cartes nel asuntu, como-y correspuende, al traviés de la Inspección de Trabayu. Los befeneficios de los inversores nun puen condicionar la protección de les persones que trabayen nes empreses. Por ello, la CSI desixe’l cumplimientu total de la llei de Prevención de Riesgos Llaborales, pa que Felguera Construcciones Mecániques tenga un serviciu de prevención eficaz y adaptáu a los riesgos propios d’esti trabayu. [+Info: La Nueva España] |
||||
| ASESORÍA LLABORAL: Información sobro la xubilación anticipada | ||||
Acaba’l plazu pa comunicar les xubilaciones anticipaes 28-07-2010 Esti ye un avisu pa toles persones que teáis -o conozáis que tean- en procesu de xubilación anticipada y que tean suxetos a ésta por ALCUERDU D’EMPRESA (nun inclúi los que vengan recoyíos por convenios). Según lo publicao nel BOE de 8 de xunetu páx. 59983/84 dispónense de 30 díes, a partir del mesmu 8 de xunetu, pa que la empresa comunique a la Seguridá Social l’alcuerdu de xubilación anticipada. |
||||
| LLIBERTAES: Absueltos del delitu d’usurpación pero condergaos a pagar una multa | ||||
28-07-2010 Güei conocióse la sentencia qu’absuelve a dos militantes de la CSI del delitu d’usurpación, al tiempu que los conderga a pagar caún 90 euros por una falta de daños. Coles mesmes, obliga a los dos sindicalistes a pagar 40 euros a la FADE pa que reponga la pesllera "forzada", según la sentencia, pa entrar nuna planta abonada de la Casa Sindical d’Avilés. Asina, el poder xudicial non solo garantiza la propiedá privada, que pa la mayoría supón la privación de propiedá. Amás, sofita’l movimientu "okupa" si ye encabezáu pola patronal y siempres que se garantice que los llocales nun van tener nenguna utilidá social. Nun momentu de crisis de beneficios, nun se toleren nin la recuperación de fábriques pa producir lo que precisamos –non lo que demanden los inversores– nin la ocupación de llocales pa defender los nuesos derechos. La CSI va siguir reivindicando l’usu social y sindical d’esti espaciu, amás de la importancia d’invertir una lóxica qu’apurre les llaves de les cárceles a los que tendríen de ser los sos principales inquilinos. [Lleer+: Comunicáu de la CSI] [+Info: La Nueva España] [+Info: El Comercio] |
||||
| CRISIS: Vídeu sobro'l triunfu de la selección española de fútbol nel mundial de Sudáfrica | ||||
| CSI: Despidida de José Antonio Álvarez Viejo | ||||
23-07-2010 El pasáu xueves conocimos la noticia triste de la muerte del compañeru Viejo, por causa d’un ataque al corazón mientras disfrutaba de les sos vacaciones en Teverga. A pesar de que lu treslladaron n’helicópteru hasta l’hospital d’Uviéu, los servicios médicos nun pudieron faer nada pa reanimalu. José Antonio Álvarez Viejo, de 56 años, yera afiliáu fundador de la CSI y presidente del Comité del Tallerón (La Felguera, Calderería Pesao) en Xixón. Tamién formó parte de la Executiva del nuesu sindicatu durante seis años como responsable de Rellaciones Unitaries. Güei celebrose’l funeral a les 12 h nel Tanatoriu de Xixón, onde decenes de persones acompañaron a la familia. |
||||
| LLIBERTAES: Xuiciu a dos sindicalistes de la CSI | ||||
22-07-2010 Ayeri celebróse la vista contra los dos afiliaos de la CSI acusaos de "usurpación" de la planta que la FADE tien abandonada na Casa Sindical d’Avilés. La Fiscalía realizó una ufierta na que’l delitu d’usurpación amenorgábase a una falta, na que los denunciaos asumíen l’usu de la coacción pa entrar nel llocal y realizar unes semeyes que, anguaño, constituyen la base de la denuncia realizada pola CSI. Esti puntu refugóse, yá que nun s’usó la violencia en nengún momentu, polo que se celebró la vista a partir de l’acusación inicial. El representante de la FADE afirmó que’l llocal usábase como almacén y qu’inclusive disponía de lluz. Poro, hasta l'informe policial confirma tolo contrario: la lluz taba cortada y la planta ta inhabilitada per una montonera de muebles inservibles, anque yá sabemos que la patronal tiende a l'acumuladura. [+Info: El Comercio] |
||||
| LLIBERTAES: Concentración. Miércoles 21, 9:15 h. Xulgaos d’Avilés | ||||
16-07-2010 El prósimu miércoles 21 de xunetu va tener llugar el xuiciu escontra los dos sindicalistes de la Corriente Sindical d’Izquierda, acusaos d’ocupar la primer planta de la Casa Sindical avilesina que la Patronal (FADE) tien concedía comu oficines, pero qu’enxamás utilizó y que lleva abandonada más de 10 años, col so consiguiente deterioru. La CSI quier reivindicar l’usu d’esti espaciu pa la braera defensa de los nuesos drechos comu trabayadores y pa la so reutilización notres actividaes, nuna ciudá na que les asociaciones atópense con torgues abondes pal desendolcu los sos llabores. Asina les coses, la CSI convoca una concentración de sofitu a estos dos sindicalistes, que va tener llugar el prósimu miércoles 21 de xunetu, a les 09:15 h, delantre los xulgaos d’Avilés. |
||||
| CRISIS: Protesta contra les polítiques del gobiernu presidíu por Álvarez Areces | ||||
10-07-2010 Casi doscientes persones manifestáronse a la llegada del tren de la Selmana Negra, anque na so lliteratura nun va haber de xuru espaciu nin pa la crónica de los efectos de la crisis, nin pa retratar a los nuesos criminales de guante blancu, pero de carne y güesu. Na protesta, convocada pola Plataforma Social contra la Crisis, participaron colectivos de trabayadores pertenecientes a empreses amenaciaes col pieslle, integrantes del "Conceyu de paraos y precarios" y persones a títulu individual cansaes de ver pisotiaos los sos derechos. La contundente respuesta de la policía a la bulla a Vicente A. Areces y a la demanda de polítiques sociales, ye lo más tresgresor que puede ufiertar l'eventu entamáu por Paco Ignacio Taibo II: a un manifestante identificáronlu y lliberáronlu gracies a la presión de los que lu acompañaben; a una moza arrestáronla mientres la Policía cargaba contra les que-yos puchaben pola brutalidá emplegada. La protesta treslladóse a la Comisaría de la Policía Nacional y dempués al Muséu del Ferrocarril, hasta que punxeron en llibertá a la moza, más de dos hores dempués, acusada d'unos cargos de que nun-y comunicaron los detalles.
[Crónica: Asturbulla] [+Imáxenes: Glayíu] [+Info: La Nueva España] [+Videu: El Comercio] [+Videu: RTPA] |
||||
| LLIBERTAES: La FADE inutiliza la primer planta de la Casa Sindical d'Avilés | ||||
06-07-2010 En faciendo declaración énte la xueza d’instrucción, los afiliaos del nuesu sindicatu conocieron el pidimientu que va realizar la fiscalía nel xuiciu que se va celebrar el próximu día 21 de xunetu. D.A. y M.N. refugaron la propuesta d’aceptar una falta y una multa pa rematar col procedimientu rápidu empecipiáu tres la denucia de la FADE, avisada por dalgún de los inquilinos actuales de la Casa Sindical d’Avilés. Énte la negativa de los imputaos frente a esta "xenerosa ufierta", la fiscalía va realizar un pidimientu de conderga de mil euros de multa por un delitu de "usurpación con violencia". Too ello a pesar de que l’atestáu policial confirmaba que los locales taben abandonaos. La CSI va siguir denunciando la usurpación, por parte de la patronal FADE, de los locales que tendríen que s’usar pa defender los drechos de clas trabayadora.
[+Info: La Nueva España] [+Info: El Comercio] |
||||
| LLIBERTAES: Denuncia de la usurpación de la Casa sindical pola FADE | ||||
02-07-2010 Dos afiliaos del nuesu sindicatu -D.A. y M.N.- tán citaos el martes que vien, día 6, a les 9:45 h nel Xulgáu d'Instrucción nu 4 d'Avilés, acusaos de "usurpación y daños menores", en siendo deteníos y conducíos a comisaría güei pela mañana pola Policía Nacional. Ayeri xueves, pela tarde, delles afiliaes de la CSI entraron, usando namás que l'ascensor, al primer pisu de la Casa Sindical d'Avilés. Esti ampliu espaciu, asignáu hasta agora a la patronal FADE, llevaba dellos años abandonáu y en a bien a les clares deterioráu; ello daba problemes importantes nel pisu baxu, que comparten CCOO y UXT; amás d'estos dos sindicatos -que disponen caún de dos pisos d'hacia 200 metros cuadraos nel edificiu propiedá del Ministeriu de Trabayu– ta presente l'USO, qu'ocupa la segunda anque namá-y correspondería un terciu d'ésta. La CSI reivindicaba con esta acción l'usu d'espacios pa la defensa verdadera de los nuesos derechos como trabayadores, y tamién pa la realización d'otres actividaes, nuna ciudá na que les asociaciones alcuentren dificultaes p'axuntase. Mientres, la FADE presentó una denuncia pa garantizar la desocupación d'esti espaciu. La policía, en vez d'abrir les cases vacíes pola mor de la especulación inmobiliaria, presentóse darréu pa "desagospedar" a la xente que nun defende la paz social de los cementerios. [+Info: Asturbulla] [+Info: La Nueva España] [+Info: El Comercio] |
||||
|
Escribe'l to e-mail pa recibir les prósimes convocatories: |
Campañes |
 |
 |
 |
 |
 |
 |
|
 |
 |
|
 |
|
 |