Entamu del sitiu > Sectores > Administración > Alministraciones llocales > Planes d’emplegu ¡Solución ya!

Planes d’emplegu ¡Solución ya!

Toles versiones d’esti artículu: [asturianu] [Español]

xueves 31 de marzu de 2016, por CSI-Info

CSI-PLANES D’EMPLÉU (ASTURIES)

POLA REALMISIÓN DE LOS Y LES TRABAYADORES DE LOS PLANES D’EMPLÉU, COMO FIXOS INDEFINÍOS / FIXES INDEFINÍES, HASTA LA CONVOCATORIA D’OPOSICIONES PÚBLIQUES

Nos caberos tiempos, la prensa asturiana vien recoyendo los problemes llegales que tán atopando los Conceyos pa convocar Planes Llocales d’Empléu ante l’argayu demandes, sentencies ya indemnizaciones que tán xenerándose.
Los responsables públicos de dichos Planes de falen de buscar cambeos pa blindase énte futuru demandes”. Pero, dende la Corriente Sindical d’Izquierda (CSI-Planes d’Empléu) queremos faer unes cuantes valoraciones y reflexones al respeutive.
A los voceros d’estes instituciones taricióna-yos el subconsciente y amuesen la so verdadera cara, que nun ye la d’asegurar a los y les trabayadores unes condiciones dignes de trabayu y un sueldu afayadizu al llabor que desempeñen, sinón “blindase” pa que les condiciones lleonines que sufren les plantíes de los estremaos Planes d’Empléu Llocales nun puedan ser denunciaes. Desiximos a estes instituciones que dexen de blindase a elles mesmes y blinden los derechos de los y les trabayadores, asegurando un empléu dignu y con derechos a tol personal al so cargu, tantu temporales como fixos.
Los centenares de demandes xudiciales que tán recibiendo numberosos conceyos asturianos tienen el so orixe nel calter fraudulento de los contratos por obra y serviciu realizaos a estos y estes trabayadores. Contrataciones supuestamente realizaes pa dar formación y esperiencia y que en realidá tapen la cobertoria de necesidaes de plantía de los estremaos conceyos por aciu’l personal contratáu nos Planes d’Empléu. En realidá nun son los conceyos quien ufierten formación y esperiencia a los y les trabayadores sinón que, bien a la escontra, persones con formación y esperiencia acreditaes pa poder aportar a los Planes d’Empléu aseguren la correuta realización de les xeres que-yos son encamentaes énte la falta evidente de personal nes distintes plantíes municipales.
Otra de les supuestes finalidaes d’estos planes, “l’enxertamientu llaboral de persones con dificultá d’accesu al mercáu llaboral”, nun ye más qu’otra forma de mentir a la xente y un intentu de xustificación de les sos nefastes polítiques en materia llaboral nes caberes décades. Con unes alministraciones llocales y asturiana impasibles y, en munchos casos, cómplices del esmantelamientu industrial ensin alternatives, de les desllocalizaciones, la emigración de miles de mozos y moces, y non tan mozos y moces, entitulaos, entitulaes y ensin entitular, la destruición del seutor primariu, la perda de miles de puestos de trabayu en servicios públicos como sanidá o educación y nuna Asturies con una tasa de paru intolerable, querer faer culpables a los y les trabayadores de la so “dificultá d’accesu al mercáu llaboral”, ye síntoma d’unos y unes representantes públiques que viven lloñe de la realidá.
Por tou ello, dende CSI-Planes d’Empléu desiximos, una vegada más, a los representantes locales y d’ámbetu asturianu que busquen formules xurídiques y realicen les xestiones necesaries p’asegurar un empléu públicu dignu y con derechos, que repercuta na calidá de vida de los y les trabayadores y nun correutu furrulamientu de los servicios públicos que tienen d’asegurar les estremaes alministraciones.
Como primer pasu, ye necesariu trabayar p’algamar el desbloquéu de les convocatories públiques d’empléu que permiten a los Conceyos dotase del personal necesario por aciu oposición y/o concurso-oposición, y nun siguir, como yá reconocen públicamente, contratando a personal temporal pa cubrir puestos estructurales y de plantía. Hasta’l momentu d’estes convocatories, los Conceyos deben realmitir como indefiníos non fixos a los y les trabayadores que los sos contratos actuales o acabante rematar fueron realizaos en fraude de llei y que yá tán realizando los trámites alministrativos y llegales pa qu’asina se-yos reconoza. Porque, d’otra manera, ¿cómo piensen cubrir eses necesidaes de plantía que yá reconocen públicamente?: ¿doblando les xeres del personal fixo?, ¿privatizando servicios pa regalar perres a empreses privaes? ¿o, cenciellamente, nun van faer nada y van dexar que se siga deteriorando la calidá de los servicios públicos?
D’últimes dende CSI-Planes d’Empléu queremos faer un llamamientu a toos aquellos alcaldes, conceyales d’empléu y sindicatos firmantes de los estremaos convenios coleutivos de Planes d’Empléu, a que faigan una fonda reflexón del dañu que fixeron demientres toos estos años a miles de trabayadores, al contratales en condiciones fraudulentas y precaries y escuchen les llexítimes reivindicaciones de los y les trabayadores.

http://www.elcomercio.es/oviedo/201603/31/ayuntamiento-deja-millones-sentencias-20160331002630-v.html