Entamu del sitiu > Sectores > Administración > Alministraciones llocales > LA CSI DENUNCIA ÉNTE INSPEICIÓN DE TRABAYU A LA MUTUA IBERMUTUAMUR Y LA (...)

LA CSI DENUNCIA ÉNTE INSPEICIÓN DE TRABAYU A LA MUTUA IBERMUTUAMUR Y LA FUNDACIÓN DEPORTIVA MUNICIPAL

Toles versiones d’esti artículu: [asturianu] [Español]

llunes 25 de abril de 2016, por CSI-Info

POR DESOBEDECER LES INSTRUICIONES DE LA INSPEICIÓN DE TRABAYU Y DE L’INSTITUTU ASTURIANU DE PREVENCIÓN DE RIESGOS LLABORALES NES PISCINES MUNICIPALES D’AVILÉS

La mutua Ibermutuamur y la Fundación Deportiva Municipal tán desobedeciendo les instrucciones daes pola Inspección de Trabayu y l’Institutu Asturianu de Prevención de Riesgos Llaborales, que riquieren a la Fundación Deportiva Municipal pa que se realizaren reconocencies méLiques específiques pa la vixilancia de la salú de los y les trabayadores municipales y de les empreses subcontrataes, que podríe tar amenaciada pol riesgu d’inhalación de partícules de polvu de poliuretanu en mal estáu, desprendíu del sobretechu la piscina La Madalena.

D’esta forma, los y les trabayadores de la piscina municipal de La Madalena alleguen a la mutua Ibermutuamur pa reclamar la realización de les reconocencies méliques riquíes pola Inspeición de Trabayu y l’Institutu Asturianu de Prevención de Riesgos Llaborales, atopándose con que tala mutua niégase a realizar tales reconocencies.

Va unes selmanes, la Corriente Sindical d’Izquierda denunciaba, ante la Inspeición de Trabayu, el mal estáu de los recubrimientos de poliuretanu del falsu techu de la cubierta de la piscina y de los tubos de ventilación, que prevocaba la dispersión de polvu y partícules nel ambiente y podríen afeutar a la salú de quien pudieren alendar dichu ambiente, esto ye, trabayadores, usuarios y usuaries.

En rempuesta a esta denuncia, la Inspeición de Trabayu, personada na piscina La Madalena, xuntu colos responsables municipales de les obres y l’equipu responsable de Prevención de Riesgos del Conceyu, dieron por solucionáu’l tema altricando qu’en diches diba procedese a la sustitución de tolos recubrimientos de poliuretano.

Coles mesmes, la Inspeición de Trabayu y l’Institutu Asturianu de Prevención de Riesgos Llaborales, encamentaron a la Fundación Deportiva Municipal a aplicar una vixilancia específica de la salú de los y les trabayadores que pudieren tar afectaes.

Sicasí, constatóse que, a día de güei, el referíu recubrimientu de poliuretanu sigue recubriendo tolos conductos d’aire acondicionáu que s’atopen nel sobretechu, tal que taba anantes d’empecipiar les obres, asina como en gran parte de les parés, ensin que procediere a la so retirada demientres les citaes obres.

Coles mesmes, la Fundación Deportiva Municipal nun comunicó estos fechos, nin de forma verbal nin escrita, a dengún trabayador o trabayadora nin, de xuru, realizó aición dalguna p’adoptar les midíes de vixilancia y control encamentaes pola Inspeición de Trabayu y l’Institutu Asturianu de Prevención de Riesgos Llaborales, cola fin de verificar les condiciones de salú y seguridá de los y les trabayadores que desempeñen les sos funciones en dichu puestu trabayu.

Agora, los y les trabayadores de les piscines municipales atópense con que la mutua Ibermutuamur niégase a realizar la vixilancia médica específica ordenada pola Inspeición de Trabayu y l’Institutu Asturianu de Prevención de Riesgos Llaborales, cola inaición, permisividá y desdexación de funciones de la Fundación Deportiva Municipal y del propiu Serviciu de Prevención de Riesgos del Conceyu avilesín.

Por tou ello, la Corriente Sindical d’Izquierda tornó interponer una nueva denuncia, énte la Inspeición de Trabayu, desixendo la puesta en marcha darréu de les reconocencies médiques solicitaes y la depuración de les responsabilidaes que pudieren apareyar los incumplimientos de la Fundación Deportiva Municipal y la mutua Ibermutuamur.