Entamu del sitiu > Sectores > Administración > Alministraciones llocales > Nuevu pieslle por obres na piscina municipal de la Madalena, (...)

Nuevu pieslle por obres na piscina municipal de la Madalena, Avilés

Toles versiones d’esti artículu: [asturianu] [Español]

llunes 9 de mayu de 2016, por CSI-Info

CSI-CONCEYU D’AVILÉS (ASTURIES)

Malpenes pasaren dellos meses dende les caberes obres realizaes na piscina municipal avilesina de La Madalena y el Conceyu d’Avilés anuncia un nuevu pieslle por obres.

Hai delles selmanes, la Corriente Sindical d’Izquierda denunciare a la Fundación Deportiva Municipal del Conceyu d’Avilés énte la Inspeición de Trabayu, por posibles irregularidaes nes obres de la piscina municipal de La Madalena, que podríen tener repercusiones na salú llaboral de los y les trabayadores, asina como na salú de los usuarios y usuaries.

De la mesma manera, la CSI también denunciare énte Inspeición de Trabayu, el mal estáu de los recubrimientos de poliuretano del falsu techu de la cubierta de la piscina y de los tubos de ventilación, que prevocaba la dispersión de polvu y partícules nel ambiente y podríen afeutar a la salú de quien pudieren alendar dichu ambiente, esto ye, trabayadores, usuarios y usuaries.

D’esta forma, la Inspeición de Trabayu, personada na piscina de La Madalena, y l’Institutu Asturianu de Prevención de Riesgos Llaborales dieron por iguáu’l tema altricando qu’en diches obres procediérese a la retirada de tolos recubrimientos de poliuretano.

Sicasí, constatóse que’l referíu recubrimientu de poliuretano sigue recubriendo tolos conductos d’aire acondicionáu que s’atopen nel sobretechu, tal como taba anantes d’entamar les obres, asina como en gran parte de les parés, ensin que se procediere a la so retirada demientres les citaes obres.

Como respuesta a too ello, el Gobiernu Municipal d’Avilés asoleyó unes declaraciones públiques nes qu’aseguraba que na piscina municipal de La Madalena realizárense toles obres d’acondicionamientu necesaries, incluyíes aquelles intervenciones empobiinaes a garantizar la salú de los y les trabayadores asina como de de los usuarios y usuaries.

Pero, agora, namás qu’unes selmanes dempués, la Conceyala Deportes anuncia un nuevu pieslle por obres na piscina municipal de La Madalena.

Énte too ello, la Corriente Sindical d’Izquierda quier plantegar una riestra cuestiones a les que los responsables municipales tendríen de salir al pasu:

1-Ta nidio que nes anteriores obres de la piscina municipal de La Madalena nun se retiraron los recubrimientos de poliuretano. ¿Desobedeciéronse, poro, les instruiciones de la Inspección de Trabayu y del Institutu Asturianu de Prevención de Riesgos Llaborales?.

2-¿El Gobiernu Municipal d’Avilés pagó una gran cantidá de dineru por unes obres que, en parte, nun se realizaron?. ¿El Gobiernu Municipal d’Avilés pagó la parte correspondiente a la retirada de los recubrimientos de poliuretano y esta retirada nun se realizó?.

3-Si nestes nueves obres anunciaes pol Gobiernu Municipal se procede a la retirada de los recubrimientos de poliuretano, ¿va pagase, per segunda vegada, unos trabayos que yá deberíen d’habese realizao nes anteriores obres?.

Dende la Corriente Sindical d’Izquierda camentamos qu’estes cuestiones tienen de ser esclariaes cuanto anantes polos responsables municipales pa estenar cualisquier dulda alrodiu les posibles irregularidaes denunciaes.

(Semeya de les denuncies de la CSI, sobre los recubrimientos de poliuretanu).