Entamu del sitiu > Estayes > Rellaciones xunitaries > Asturies > Xuicio-Concentración pola Absolución d’Aitor

Xuicio-Concentración pola Absolución d’Aitor

Martes 22 de payares 2016, a les 9:00 h. Xulgaos de Xixón. Pza. del Decano Eduardo Ibaseta, s/n, Xixón, Asturies.

Toles versiones d’esti artículu: [asturianu] [Español]

martes 22 de payares de 2016, por CSI-Info

ENTAMEN: CSI, CGT, CNT-Xixón, SUATEA, SESTAFERIA, FUSOA, PICU RABICU, LA LLEGRA, LA SEMIENTE, LA XUSTICIA, LA LLUME, XIXÓN ANTIFACISTA, PARA@S-PRECARI@S D’ASTURIES, DARRÉU, MIERES EN LLUCHA.

SOPELEXU DE LA MANIFESTACIÓN POLA ABSOLUCIÓN D’AITOR

“Nun emigres, llucha”. Eso dicía la famosa pintada pola qu’Aitor ta acusáu d’un delitu de daños.

Nun ye l’únicu casu. Cada vez ye mayor el númberu persones que se ven sentaes nel banquín de los acusaos por cometer el tarrecible delitu de realizar la más mínima protesta escontra cualisquier inxusticia. Nos caberos años, centenares de persones pasaron y siguen pasando pelos tribunales d’Asturies, miles nel conxuntu del Estáu español, pa ser xulgaes ya, inclusive, zarraes en prisión, por defender derechos tan básicos como’l trabayu, la vivienda, la sanidá, la educación o los servicios sociales.

Pero esto nun ye nuevo. La Xusticia nunca foi ciega y la so balanza inclínase del llau de los poderosos. Demientres se castiga con multes ya, inclusive, unvíase a la cárcel a quien lluchen polos sos derechos, déxase en llibertá a quien roben el dineru y los recursos que precisamos pa sobrevivir.

D’esta forma, miles d’asturianos y asturianes vense condergaes a la emigración p’atopar una forma de ganase la vida.

Pero echar la galga a esta sangría nun entra dientro los planes de quien nos gobiernen. Ellos prefieren ponese de parte de les grandes empreses que, como El Corte Inglés, suman beneficios millonarios a cuenta salarios de miseria por xornaes de trabayu interminables.

Toos y toes sabemos quién son y ónde tán los verdaderos delincuentes que nos tán llevando a la ruina y a la miseria. Pero ellos gocien d’impunidá. Lluchar polos tos derechos puede empobinate, inclusive, a la cárcel, pero facete millonariu a base d’estafes, fraudes y práutiques corruptes, faite intocable.

Tolos seres humanos tendríen de tener garantizaos los sos derechos básicos pol simple fechu d’esistir. Pero nun ye asina. Los únicos que nacen con derechos son los ricos. Los y les trabayadores tenemos de conquistar esos derechos y, dempués, lluchar pa caltenelos, porque si non, perdémoslos.

Nun-yos importa que tengamos que comer de lo qu’atopemos na basura, nun-yos importa que morramos por falta calefaición o por non tener accesu a melecines o curiaos sanitarios, nun-yos importa que namás los ricos tengan accesu a los estudios, nun-yos importa que les persones con necesidá d’atención social, acaben tiraes peles cais.

Pero, como nel casu d’Aitor, lluchar por una Asturies más xusta, na que naide tenga qu’emigrar p’Algamar una forma de ganase la vida, acaba tornándose nun delitu Creo que yá va siendo hora de dexar de sentar nel banquín de los acusaos a quien a cencielles engarren polos derechos más básicos de les persones, como ye’l derechu a trabayar o tener una forma de ganase la vida nel país nel que vives y entamar a sentar nesi banquín a estes lleis demenciales y a quien nos les imponen pa siguir calteniendo los sos privilexos a cuenta de la nuesa probitú y el deterioru de les nueses condiciones de vida.